هو الجو بيستهبل كده ليه؟! 2

المرة اللي فاتت كنا اتكلمنا عن الخطوات الأولي في علم الهندسة الجيولوجية أو “هندسة المناخ” ووقفنا عند اختراع تسلا لتوليد ونقل الكهرباء عبر مصادر طبيعية, يعني من غير كابلات ولا محولات ولا أي حركات. الكلام ده كان سنة 1900. يللا بينا نكمل الرحلة

سنة 1902 تم اختراع أول “مدفع لصنع المطر” – The Steiger Vortex gun – آلبرت فورتكس كان اخترع المدفع ده لحماية مزارع العنب من الآثار المدمرة للعواصف اللي بتسبب سقوط البرد- يعني الأمطار المتجمدة- في إقليم في النمسا مشهور بصناعة النبيذ. المدفع كانت فكرته إنه بيطلق شحنات من الغاز بتسبب اهتزازات وذبذبات في السحب وبتنزل المطر في الوقت اللي تكون فيه درجة الحرارة أعلى من الصفر, فالسحاب يفضي المطر اللي فيه وينزل كمطر بدل ما يبقى فيه احتمال انه ينزل كبرد بعدين ويبوظ المحصول.المدفع ده اتنقل بعد كده لأستراليا عن طريق كلمنت راجدج – Cliement Wragge- لما شاف المدفع في زيارة للنمسا, وفكر في استخدامه في مكافحة موجة الجفاف في استراليا ساعتها. ودي كانت البداية الحقيقية لفكرة استخدام السحاب الموجود في صناعة المطر بدل صناعة سحاب من أول وجديد.

سنة 1924 تم اكتشاف حقيقة ان موجات الراديو بتنعكس عن طبقة الأيونوسفير. طبقة الأيونوسفير هي طبقة مشحونة كهربيا من طبقات الجو العليا على ارتفاع 50 كم تقريبا. يعني طبقة الأيونوسفير بالنسبة لموجات الراديو زيها زي المراية بالنسبة لأشعة الضوء. الاكتشاف ده كان من أهم الاكتشافات في تاريخ تعديل الجو والهندسة الجيولوجية, وهنفهم بعدين ليه. بس اقدر اقول لكم ان دي كانت اﻷصل في فكرة التحكم في الجو في مكان في الجانب اﻷخر من الكوكب، وعمر التطبيق العملي الموجود حالياً ما كان هيبقى متاح من غير الاكتشاف ده.

سنة 1929 ظهرت فكرة أو نظرية اتكلمت عن استخدام مرايات مقعرة عملاقة تتحط في الفضاء عشان تجمع أشعة الشمس وتستخدم في القضاء على جبال الثلج العائمة في المحيط الأطلسي والقطب الشمالي – الكلام ده كان بعد ما تيتانيك غرقت ب 17 سنة, بس فكرة ان جبال الجليد مؤذية ولازم نخلص منها كانت موجودة من زمان زي ما شفنا في التدوينة اللي فاتت, وزادت أكتر بعد غرق تيتانيك.

سنة 1938 اقترح عالم مقدرتش اوصل لأسمه انه يقدر ينور السما بالليل عن طريق إطلاق موجات من جيروترون – Gyrotron – من م فائق القوة (دخلنا بقى في الكلام الكبير اللي بيتعب عشان نفهمه – بفتح الهاء- ونفهمه -بكسر الهاء(. الجيروترون هو نوع من أنواع أنابيب الإلكترون فائقة القوة يصدر موجات كهرومغناطيسية في تردد من 20-250 جيجا هرتز, وهو نوع من أنواع تعظيم أو تضخيم موجات الميكرويف عن طريق تحفيز إنبعاثات إشعاعية. الجيروترون بيستخدم في المفاعلات النووية في عملية الانصهار الذري, وفي مصانع الزجاج والسيراميك والحاجات اللي بتحتاج درجات حرارة عالية حدا لتصنيعها. الجيروترون بيستخدم برضه في سلاح غير مميت إسمه “نظام الرفض النشط” – Active Denial System – وده بيستخدم في رفع درجات حرارة مناطق عشان يمنع الجنود والمركبات من الوصول لها.إربطوا ده بفكرة انعكاس موجات الراديو عن طبقة اﻷيونوسفير عشان الفكرتين دخلوا ف بعض بعد كده.

سنة 1940 نشرت نيويورك تايمز الأمريكية مقالة عن اختراع تسلا لما يسمى ب”أشعة الموت”. الجريدة وصفت السلاح بأنه شعاع صادر من مدفع جزيئات قادر على إذابة أي معدن على بعد ممكن يوصل لأكتر من 4 كيلومترات. الفكرة أساسا كانت لمنع الهجمات الجوية بالطائرات وكانت فكرة دفاعية -عبقرية تسلا فعلا ملهاش حدود, الراجل ده أفضاله على علم الفيزياء ما تتعدش! من الأخر يعني, الراجل عمل مدفع ليزر أو توصل للفكرة اللي تخلي المدفع يتعمل. على فكرة أمريكا أعلنت عن نجاح تجربة المدفع في 2010. يعني في الغالب كان متاح من قبلها بسنين. وده فيديو من النشرة الإخبارية اللي أعلنت الخبر http://www.youtube.com/watch?v=bTCQvhlz4L8 

سنة 1945 بدأت تجارب القنابل النووية اللي نتج عنها 40,000 نبضة كهرومغنطيسية. وظهرت برضه فكرة تذويب القطب الشمالي عن طريق القنابل الذرية (عامل لهم هسهس القطب الشمالي مش فاهم ليه). هنا نفتكر مع بعض موضوع ذبذبات الأرض وترددها, وفكرة إضائة السما بالليل عن طريق ذبذبات كهرومغنطيسية. البازل هيكمل بعدين بس اصبروا عليا ونمشي واحدة واحدة.

سنة 1946 إخترع فنسنت شيفر – Vincent Shaefer – تقنية “بَذر السحب”- Cloud Seeding – , بمعنى التأثير على السحب عشان تمطر بدل ما نعمل سحب من أول وجديد ونستناها تمطر زي ما كانوا بيعملوا زمان. الفكرة ببساطة هي تغيير والتحكم في نسبة هطول الأمطار عن طريق رش مواد زي يوديد الفضة وثاني أكسيد الكربون الصلب أو الثلج الجاف كما يسمى. ده بيغير التفاعلات الميكروفيزيائية جوه السحب عشان السحاب يتقل وينزل المطر اللي فيه نفس الوسيلة ممكن تستخدم لتفريق الضباب برضه. بَذر السحاب ممكن يتم عن طريق رش المواد دي من طائرات أو أو عن طريق مولدات لغازات موجودة على الأرض وده كان تطور فكرة مدفع الفورتكس اللي اتكلمنا عليه من شويتين.

سنة 1947 بدأ مشروع “سايرس” -Project Cirrus – المشروع ده كانت فكرته القضاء على العواصف الاستوائية وأعاصيرها عن طريق استخدام الوسيلة اللي لسه شارحينها حالاً لتفريق الإعصار أو العاصفة. ودي كانت أول محاولة لتغيير نمط  إعصار وتفريقه في التاريخ.

سنة 1948 اقترح جوزيف ستالين “الخطة العظيمة لتغيير الطبيعة” -The Great Plan for the Transformation of Nature- ودي كانت خطة لتطوير الزراعة في الاتحاد السوفييتي عن طريق حفر قنوات ري كتير وزرع أحزمة شجر ممتدة حوالين المزارع لمنع العواصف من تدمير المحاصيل مع استخدام تكنولوجيا بَذر السحب لإسقاط الأمطار عند الحاجة للتدخل في حالة الجفاف مثلا.

فاكرين ان كده الموضوع ابتدى يكبر ويدخل في الغويط؟ انتم لسه مشفتوش حاجة. دلوقتي انا محتاج انام عشان عندي شغل بدري بكره, بس اوعدكم اني حاكمل ان شاء الله, واوعدكم انها هتحلو فوق ما انتم متخيلين.

تصبحوا على خير وجو جميل!

محمود عثمان
الرابع من مايو 2013
مدينة 6 أكتوبر

4 thoughts on “هو الجو بيستهبل كده ليه؟! 2

  1. Seriously WOW!! An amazing through research on weather control, I haven’t thought of looking deeper into this topic. Thank you so much for the useful information and looking forward for more. One question though, have they ever thought of the impact of melting the North Pole on earth in general? It takes me back to the movie “Water World”, is this scientific by any mean?
    Anyway all I feel like saying now is “Poor Earth”😦

    • Thanks Cookie…I’ll try my best to be up to the expectations.

      As for melting the north pole, as far as my readings have gone it was always a hypothesis. No one has managed to precisely predict the exact outcome. However, I think with the fact that it’s taking place slowly over the years now, more analysis to the consequences is being carried out.

  2. It’s so depressing yet so enlightening……… Everything is becoming crazy yet what only makes me stronger and able to digest what’s happening in the world -and specially to our concepts, beliefs and minds as Muslims- is that I can hear someone like you talking my mind out and proving to me that I haven’t gone crazy yet. I once had a conversation with you about Palestine and since then I’ve always knew that you are someone born to make a difference🙂 Keep writing more and more and more…….. maybe at some point you’d be heard and you’d make a great difference….. Good luck🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s